បាត់ដំបង ៖ នៅវេលាម៉ោង១២និង០០នាទី ថ្ងៃទី២៣ ខែកញ្ញា ឆ្នាំ២០១៥នេះ លោកព្រះរាជអាជ្ញារងសង់ សុយុទ្ធារា បានដឹកនាំកម្លាំង ដោយក្នុងនោះមានលោកឧត្ដមសេនីយ៍ស្នងការរង ជេត វណ្ណនី លោកអធិការ ពេជ្រ សារ៉ែន និងអាជ្ញាធរមូលដ្ឋានបានចុះទៅចំណុចផ្ទះស្ត្រីដែលបានជេរប្រមាថដល់ សមត្ថកិច្ចយ៉ាងកប់ៗមាត់ ដើម្បីសម្រេចកាត់សោផ្ទះ និងនាំយករថយន្តដែលបង្កហេតុទៅរក្សាទុកនៅក្នុងអធិការដ្ឋាននគរបាល ស្រុកសំពៅលូនជាបណ្ដោះអាសន្នបន្ទាប់ពីស្ត្រីរូបនេះបានយករថយន្តទៅ លាក់ទុកក្នុងផ្ទះនេះ ហើយបានចាក់សោគេចខ្លួនមិនព្រមចេញមុខមកទទួលខុសត្រូវលើករណី គ្រោះថ្នាក់ចរាចរណ៍ដែលនាងបានបង្កប្រកបដោយភាពស្រវឹងនោះឡើយ។
បើតាមប្រភពច្បាស់ការមួយបាននិយាយថា ស្ត្រីរូបនេះគឺជាស្ត្រីមេម៉ាយ ដែលមានស្រុកកំណើតនៅខេត្តកំពង់ចាម ដោយបានមករស់នៅទីនេះប្រហែលកន្លះឆ្នាំហើយ ដោយបានប្រកបមុខរបរកែសម្ផស្សផង និងរកស៊ីផង ដោយអស់លោក និងមន្ត្រីធំៗនៅក្នុងតំបន់នេះគឺនាងស្គាល់ទាំងអស់ ហើយឧស្សាហ៍ជួបជុំផឹកស៊ីជាមួយគ្នាថែមទៀត ដូចជាចេញទៅផឹកនៅខេត្តបាត់ដំបង បន្ទាយមានជ័យ ឬក៏នៅក្នុងស្រុកសំពៅលូននេះតែម្ដង ដោយនាងមានការពាក់ព័ន្ធរឿងស្នេហាជាមួយនឹងមន្ត្រីយោធាម្នាក់ដែល មាននាទីនៅក្នុងក្រុមការងារទំនាក់ទំនងព្រំដែនកម្ពុជា-ថៃ និងឈរជើងនៅប្រចាំច្រកតំបន់ភ្នំដីនេះតែម្ដង ដោយមនុស្សម្នាក់នេះហើយដែលបានចេញមុខកាងកាលពីយប់ថ្ងៃបង្កហេតុ នោះ ដើម្បីឲ្យនាងយករថយន្តមកលាក់ទុកបែបនេះ។
លោកស្នងការរងបានសង្កត់ធ្ងន់ថា ប្រការដែលលោកព្រះរាជអាជ្ញាធ្វើបែបនេះគឺតម្រូវឲ្យស្ត្រីដែលមាន ឈ្មោះ សូ ដាម៉ុន នេះចូលខ្លួនមកដោះស្រាយនៅចំពោះមុខច្បាប់ ប៉ុន្តែប្រភពមួយបានឲ្យដឹងថា បច្ចុប្បន្នស្ត្រីរូបនេះប្រហែលជាកំពុងសំងំនៅក្នុងប្រទេសថៃ ដោយមិនទាន់ហ៊ានចេញមុខមកនោះឡើយ៕
Post a Comment