រាជធានីភ្នំពេញ ៖ តាមសេចក្តីរាយការណ៍បានឱ្យដឹងថា សន្តិសុខយាមហាងមាសពេជ្រមួយកន្លែងយីហោហង្សមាសបានដេកស្លាប់នៅមុខហាងត្រូវបានគេប្រទះឃើញបង្កឱ្យមានការភ្ញាក់ផ្អើលកាលពីវេលាម៉ោង៦ និង៥នាទីព្រឹក ថ្ងៃទី ២០ សីហា នេះ នៅចំណុចមុខផ្ទះលេខ៤៩២-៤៩៤ មុខផ្សារសាមគ្គី ផ្លូវម៉ៅសេទុង សង្កាត់ទឹកល្អក់១ ខណ្ឌទួលគោក។ សន្តិសុខដែលដេកស្លាប់នោះឈ្មោះទ្រី ណារិន្ទ ភេទប្រុស អាយុ៣០ឆ្នាំ ស្នាក់នៅមុខហាងមាសខាងលើ មានស្រុកកំណើតភូមិព្រែកឈ្មោះ ឃុំព្រែកតាសួរ ស្រុកពារាំង ខេត្តព្រៃវែង។ បើតាមនគរបាលមូលដ្ឋានបានឱ្យដឹងថា ជនរងគ្រោះជាសន្តិសុខប្រជាការពារសង្កាត់ ហើយបានមកដេកយាមនៅចំណុចខាងលើជាមួយកម្លាំងប្រជាការពារផ្សេងទៀត លុះដល់ព្រឹកឡើងក៏មានការភ្ញាក់ផ្អើលដោយសារអ្នកមើលខុសត្រូវហាងមាសចេញមករៀបចំបើកហាងឃើញជនរងគ្រោះអត់ទាន់ក្រោកពីដេក មានការសង្ស័យក៏នាំគ្នាទៅដាស់ទើបដឹងថា គាត់ស្លាប់បាត់ទៅហើយ។ តាមសន្តិសុខដូចគ្នាបានឱ្យដឹងថា កាលពី៣ថ្ងៃមុនជនរងគ្រោះហាក់ដូចជាមិនសូវស្រួលខ្លួន ហើយមានទឹកមុខមិនសប្បាយចិត្ត លុះយប់ឡើងមុនពេលកើតហេតុគាត់ដេកអត់លក់ចេះតែនិយាយគ្នាលេងពីនេះពីនោះជាមួយសន្តិសុខដែលយាមជាមួយគ្នា ស្រាប់តែព្រឹកឡើងក៏មានការភ្ញាក់ផ្អើលថាគាត់ស្លាប់តែម្តង។ ករណីនេះ សមត្ថកិច្ចដែលធ្វើកោសល្យវិច័យសពបានឱ្យដឹងថា ជនរងគ្រោះស្លាប់ដោយសារគាំងបេះដូង៕
Post a Comment