ខេត្តកំពង់ធំ ៖ បច្ចុប្បន្ននេះដោយសារតែអត្រាផលត្រីកាន់តែមានការថយចុះពីមួយឆ្នាំទៅឆ្នាំជាលំដាប់ ប្រជាពលរដ្ឋប្រើប្រាស់ឧបករណ៍នេសាទតាមលក្ខណៈគ្រួសារ ក៏សឹងតែរកត្រីសម្រាប់បរិភោគក្នុងគ្រួសារ និងលក់ដូរបន្តិចបន្តួចលែងបាន ព្រោះតែមានឧបករណ៍នេសាទខុសច្បាប់ច្រើនពេកនៅក្នុងភូមិសាស្ត្រខេត្តកំពង់ធំផងនោះ ទើបធ្វើឲ្យប្រជាពលរដ្ឋងាកមករកនេសាទឈ្លើងវិញម្តង។ ប្រជាពលរដ្ឋមួយក្រុមមានគ្នាប្រមាណជិត១០នាក់បានរៀបរាប់ឲ្យដឹងថា ពួកគាត់រស់នៅភូមិរការ សង្កាត់ស្រយូវ ក្រុងស្ទឹងសែន ដោយសារតែរកត្រីលែងសូវបាន ទើបពួកគាត់នាំគ្នាមករករបរចាប់ឈ្លើងលក់វិញម្តងនៅគ្រប់បឹងបួរ ត្រពាំងឲ្យតែកន្លែងណាសម្បូរឈ្លើង ។ ពួកគាត់ប្រាប់ទៀតថា ចំពោះបញ្ហានេសាទឈ្លើងនេះវាមានការងាយស្រួលជាងនេសាទត្រីទៅទៀត ដោយគ្រាន់តែយកជើង ឬក៏ប៉ោតស្ពេត្រូទៅវីៗទឹកនោះនៅពេលដែលឃើញឈ្លើងវាហែលមក រួចយកកូនកញ្រែ្ចងដួសដាក់ចូលក្នុងប្រហោងប៉ោតស្ពេត្រូ ដែលបានចោះទុករួចជាស្រេចសម្រាប់ដាក់ឈ្លើង។ ពួកគាត់បន្តថា ឥឡូវនេះសត្វឈ្លើងមានតម្លៃខ្ពស់ជាងពីមុនច្រើនណាស់ ដោយកាលពីមុនសត្វឈ្លើងសំបូរអ្នកភូមិចាប់បានក្នុងម្នាក់ពី៣គីឡូទៅ៤ ឬ៥គីឡូក្រាមក្នុង១ថ្ងៃ ហើយឈ្មួញក្នុងភូមិរង់ចាំទិញក្នុង១គីឡូក្រាម តម្លៃចាប់ពី១៥.០០០រៀលទៅ១៧.០០០រៀលប៉ុណ្ណោះ ក៏ប៉ុន្តែបច្ចុប្បន្ននេះឈ្លើងក្រណាស់ បើប្រឹងចាប់ក្នុងម្នាក់អាចចាប់បានពី១ទៅ២គីឡូក្រាម ចំណែកតម្លៃវិញខ្ពស់ចាប់ពី៣៧.០០០រៀលទៅជិត៤០.០០០រៀលឯណោះ។ ចំពោះឈ្មួញដែលរង់ចាំទិញឈ្លើងនៅក្នុងភូមិនេះ បើតាមពួកគាត់ដឹងនោះ គឺពួកគេទទួលទិញស្តុកទុកនៅពេលណាបានច្រើនគ្រប់ចំនួនដែលគេកំណត់ ទើបមានថៅកែធំនៅឯខេត្តបាត់ដំបងគេមកថ្លឹងម្តង ចំណែកឈ្មួញខ្លះទៀតគេយកឈ្លើងនេះទៅសម្លាប់ រួចដាក់ឆ្អើរឲ្យក្រៀមសិនទៅតាមបច្ចេកទេសរបស់គេដល់បានច្រើនទើបថ្លឹងលក់ឲ្យជនជាតិចិនមកយកម្តង រីឯឈ្លើងក្រៀមក្នុង១គីឡូថ្លៃប៉ុន្មាននោះ ពួកឈ្មួញគេពុំប្រាប់នោះទេ ពីព្រោះជាមុខរបររកស៊ីលាក់ការរបស់គេ គាត់គ្រាន់តែចាប់បានឈ្លើងរស់ៗយកទៅលក់ឲ្យគេ គ្រាន់បានលុយបន្តិចបន្តួចយកមកចិញ្ចឹមជីវិតក្នុងគ្រួសារតែប៉ុណ្ណោះ មានថ្ងៃខ្លះចុះទៅចំបឹងដែលសំបូរឈ្លើងទៅ ក៏ចាប់បានច្រើន ជួនពេលខ្លះ មិនបាន១គីឡូផងក៏មាន៕
Post a Comment